Црвена звезда денеска испрати порака до медиумите од извршниот директор Звездан Терзиќ и изрази сочувство до народот на Македонија по страшната трагедија во Кочани. Терзиќ потврди дека „Црвено-белите“ ќе одиграат хуманитарен натпревар во Скопје.
„Сите во Црвена звезда беа длабоко потресени од трагедијата што се случи во Кочани. Веднаш стапивме во контакт со нашите играчки легенди од Скопје, Дарко Панчев и Илија Најдоски, и со нивна помош стапивме во контакт со управата на Вардар и се договоривме да го посетиме Скопје на 16 април и да одиграме хуманитарен натпревар“, извести извршниот директор на Звезда.
Сите приходи од овој натпревар ќе бидат наменети за семејствата на загинатите во оваа страшна несреќа.
„Ова е најмалку што може да направи Црвена звезда за својата братска Македонија во ова тешко време“, додаде Терзиќ.
И тој, како и сите играчи, тренери и вработени во клубот, беше погоден од веста за бројни, главно млади, жртви во соседството.
„Изразуваме искрено сочувство до сите семејства на жртвите, како и до сите граѓани на Македонија, со надеж дека овој гест ќе покаже колку нè погоди оваа трагедија и дека сме обединети во тагата со семејствата на жртвите“, заклучи Терзиќ во врска со трагичниот настан што овој вторник во Србија го одбележа како Ден на жалост.
Дарко Панчев зборувал со селекторот н Србија, Драган Стојковиќ, за хуманитарен натпревар и меѓу репрезентациите.
„Последниот ден од викендот се слушнав со Пикси Стојковиќ, кој има безброј обожаватели во Скопје и низ Македонија, предложив да се организира натпревар меѓу репрезентациите. Тој веднаш ме поддржа, идејата беше едногласно одобрена од раководните структури на Српската фудбалска федерација. Ви благодарам за подадена рака, милион пати: благодарам“, изјави Панчев за Sportklub.
