Водечкиот американски епидемиолог д-р Ентони Фаучи зборуваше за единственото сценарио кога е безбедно да се тргне маската во друштво за време на пандемијата на COVID-19.
Како што рече, во ред е да ја тргнете маската ако сте ги примиле сите дози на вакцината и ако сте во друштво на луѓе кои ги примиле сите дози. Центрите за контрола на болести (CDC) подготвуваат упатства за вакцинираните лица што ќе им помогнат да сфатат што можат безбедно да прават. Politico објави дека овие упатства ќе продолжат да препорачуваат луѓето да се ограничуваат на мали домашни собири и само со вакцинирани лица.
Препорачливо е тие да продолжат да носат маски во јавност, како и да продолжат да практикуваат социјална дистанца.
„Ако сте вакцинирани и сте со некој кој исто така е вакциниран, можете да бидете многу послободни што се однесува до мерките“, рече Фаучи.
Минатиот понеделник, Фаучи и директорот на CDC ги презентираа новите упатства.
„Ќе земам како пример дека нечија ќерка ќе дојде од друг град и ги примила двете дози, а нејзините родители и нивните соседи исто така ги примиле двете дози. Сите заедно би можеле да се дружат на мала семејна собиранка и да не носат маски бидејќи ризикот од ширење на коронавирусот е многу мал“, рече Фаучи.
Фаучи предупреди и на дружење со луѓе кои не биле вакцинирани. Тој зеде пример за баба која е вакцинирана и би дошла во посета на нејзините невакцинирани членови на семејството.
„Ако едниот од нив е заразен со вирусот, на бабата сè уште може да ѝ влезе вирусот во назофаринксот и иако вакцината ја штити и таа нема да се разболи, вирусот може да се прошири понатаму и да зарази луѓе кои не биле вакцинирани“, објасни тој.
Фаучи додаде дека почнал да кани гости во неговиот дом откако ги примил двете дози од вакцината против COVID-19, но само луѓе кои се вакцинирани. Тој нагласи дека сè уште не јаде во ресторани и дека сè уште носи маска во јавност.