Тим меѓународни научници кои работат на пронаоѓање начини за што побрзо спасување на реткиот вид северен бел носорог, рекоа дека постигнале напредок така што успеале да произведат уште три ембриони.
Конзорциумот BioRescue, предводен од професорот Томас Хилдебрант од Лајбниц институтот за зоолошка градина и диви животни во Германија, рече дека овој месец се произведени уште три ембриони од подвидот на носорог, со што вкупниот број живи ембриони се искачи на 12.
Научниците зеле јајце-клетки од една од двете преостанати женки од северниот бел носорог во паркот за диви животни во Кенија. Замрзнати сперматозоиди од двајца мртви мажјаци биле користени за оплодување, и сѐ е направено во италијанска лабораторија.
Два од трите нови ембриони се произведени со користење на семето на северниот бел носорог Суни, чиј генетски код служи за сите постоечки ембриони.
Сепак, третиот ембрион беше произведен откако семето на Ангалифу, носорог што живееше во Сафари паркот Сан Диего, а почина во 2014 година, исто така беше користено за прв пат.
Сегашниот план е да се создаваат повеќе ембриони на секои три до четири месеци, и тие наскоро ќе бидат всадени во сурогат мајката, женски јужен бел носорог, за да се спречи изумирање на северната верзија на белиот носорог. Тоа е потфат кој започна во 2019 година.
