Здружението на најголемите европски авиокомпании и аеродроми предупреди дека ќе има хаос и часови на чекање по објавувањето на ЕУ дигиталниот сертификат за COVID-19 доколку не се воспостави подобра координација меѓу земјите.
Заедничкиот европски систем за сертификација стапува на сила во четврток.
Здружението на аеродроми ACI и здруженијата на авиокомпании А4Е, IATA и ERA со писмо до европските лидери предупредуваат на „загрижувачката разновидност на пристапот“ низ целиот континент.
„Како што се зголемува сообраќајот на патници во следните недели, ризикот од хаос на европските аеродроми е реален“, се вели во заедничкото писмо до европските лидери, до кое вчера дојде Reuters.
На крајот на мај беше постигнат договор за дигитално сертифицирање на европско ниво.
Сертификатот треба да функционира во форма на QR-код на паметни телефони или на хартија, а властите ќе можат да го користат за да утврдат КОВИД статус на посетителите.
Кодот ќе покаже дали лицето е вакцинирано, негативно на COVID-19, или ја прележало болеста.
Аеродромите загрижени
Ќе бидат потребни дополнителни проверки и опрема за читање кодови на аеродромите. Во писмото од авиокомпаниите и аеродромите се вели дека чекањето и одложувањата во средината на летната сезона може да се избегнат само со имплементација на систем според кој сертификатот за вакцинација и картичката за следење на патниците ќе бидат обработени пред патникот да пристигне на аеродромот.
Исто така, се наведува дека ваквите проверки треба да се вршат само во земјите од кои заминува патникот, а не по слетувањето, а земјите-членки треба да управуваат со здравствените податоци и да обезбедуваат опрема за читање QR-кодови.
„Високото ниво на фрагментација и разлики во имплементацијата на дигиталниот сертификат (DCC), како и континуираното удвојување на проверките на документите во неколку држави, се загрижувачки“, се вели во писмото.
Директорот на ACI за Европа, Оливие Јанковец, рече дека аеродромите „стануваат многу загрижени“.
„Соочувањето со ова зголемување ќе биде предизвик без преседан“, рече тој.
Бидејќи голем дел од проверката се прави рачно на аеродром, тој рече дека е „многу, многу нервозен“.
„Времето поминато на аеродромите за време на патувањето се зголеми на 3 часа од час/час и половина пред пандемијата“, рече европскиот потпретседател на IATA, Рафаел Шварцман.
Доколку нема промени, теоретски може да има зголемување од пет на дури осум часа, посочува Шварцман.
Во пресрет на денешниот состанок на европските земји за дигиталниот сертификат, Европската комисија издаде упатства за земјите-членки во кои се наведува дека постојат 10 различни комбинации на проверки во европските земји.
Затоа постои ризик од „непотребно удвојување на мерките и последователно чекање и метеж на аеродромите“.