Сеизмолозите веќе некое време знаат за кратките, суптилни аномалии во подземните електрични полиња што се случуваат пред земјотрес; понекогаш неколку недели порано, но досега не им беше јасно што точно ги предизвикува.
Ново истражување сугерира дека одговорот може да лежи во гасовите што се акумулираат пред земјотресот. Имено, непропустливите карпести слоеви можат да се лизгаат над раседите, блокирајќи го протокот на подземните води. Кога пука оваа блокада и се намалува притисокот, се ослободува јаглерод диоксид или метан растворен во заробената вода, кој сè повеќе се шири и пробива во пукнатини на раседот. Гасот е електрифициран затоа што ослободените електрони од карпестата површина се прицврстени на молекулите на гасот, пишува Science Alert.
Во лабораторија, научниците ги тестираа реакциите на кварцен диорит, базалт и ситно-гранулиран гранит во симулации слични на земјотрес. Откриле дека наелектризираните гасни струи навистина може да бидат поврзани со фрактура на карпите.
Дали со ова може да се предвиди земјотрес?
Друга хипотеза е дека електромагнетните празнења се јавуваат кога карпите стануваат полупроводници поради покачена температура и стрес, додека некои експерти веруваат дека овие празнења не можат да бидат предиктори за земјотреси.
Ќе знаеме само по понатамошно истражување дали овие избивања навистина можат да предвидат земјотрес. Ако се покаже дека се навистина предвидувачи на земјотрес, би можеле да се приближиме чекор поблиску до попрецизно предвидување на вакви настани.
„Како резултат на овој лабораториски експеримент, може да биде можно да се открие електричен сигнал што го придружува земјотресот со набљудување на телурична струја предизвикана во спроводник, како што е челичната цевка за вода закопана под земја. Оваа идеја сега поминува низ теренски тестови на моделот“, велат научниците.