Светските медиуми пренесуваат дека Netflix USA и Netflix Australia донеле одлука да не ги прикажуваат, односно да ги избришат од понудата сите филмови во кои игра Џони Деп.
Како што се наведува, причина за тоа е неодамнешната судска одлука според која Деп е осуден за физичко и психичко малтретирање на поранешната сопруга Амбер Херд, пренесува The Sun.
Ваквите тврдења денеска беа побиени во објава на веб-страницата whats-on-netflix.com, што се води како „најголемата неофицијална фан-страница за Netflix и ваш водич за сѐ што е ново и допрва ќе дојде на Netflix“.
Во текстот стои дека објавите во разни медиуми дека Netflix ги отстранил сите филмови со Џони Деп од репертоарот, „не само што се лажни, туку и покажуваат непознавање на начинот на кој функционира Netflix“.
Понатаму, авторката на текстот Кејси Мур додава дека обично не се занимаваат со побивање гласини, но сметаат дека е важно да се разјасни оваа ситуација и да помогнат „да се изгаснат пожарите“. Исто така се додава дека медиумот нема да дава никакви коментари во врска со судскиот спор или карактерот на Деп.
„Прво, и ова го кажувам со големо жалење, некои новински куќи ‘се фатија’ за неколку вирални твитови без да ја проверат нивната вистинитост. Виралната објава на која се повикуваат повеќето медиуи е твит со 49 ретвита и неколку стотици лајкови. Една од другите рани објави што ја ‘собраа’ оваа информација беше објавата на Reddit каде што се разговараше за отстранувањето на The Rum Diaries“, стои во текстот.
Во објавата на Reddit, тие конкретно се повикуваат на „The Rum Diaries“. Овој наслов пристигна на Netflix USA на 6 декември 2019 година. Точно една година подоцна, замина од Netflix.
Причината за ова е што сите филмови на Џони Деп се лиценцирани на Netflix од Universal, Paramount, Disney и Warner Brothers. Ова значи дека на филовите им завршува циклусот на Netflix и пак се обновува (или не) во зависност од тоа кој дистрибутер ги позајмува.
Она што се случи сега е фактот дека има празнина на платформата, односно период во кој нема филмови со Џони Деп и тоа погрешно беше протолкувано како некаква намерна хајка на Netflix против Деп.
„Може да ги пребарувате сите филмови со Џони Деп на нашата страница и да видите дека тие полека се додаваат и отстрануваат со текот на времето, како и кога ќе почнат нивните договори за лиценцирање со Netflix“, стои во текстот.
На глобално ниво, многу филмови со Џони Деп сè уште се достапни на стриминг платформата Netflix. На пример, во Велика Британија се достапни Dark Shadows, Donnie Brasco, Blow, Charlie and the Chocolate Factory, Corpse Bride и Rango.
Кејси Мур на крај пишува: „Заклучокот е – новинари, работете си ја работата како што треба“.
