Финансискиот колапс на шведски Northvolt не го уништи целосно европскиот сон за развој на сопствени батерии за електрични возила, но за да го исполни веројатно ќе треба да се потпре на кинески инвестиции и експертиза.
Извршниот директор на словачкиот старт-ап InoBat Маријан Бочек мораше да работи напорно за да обезбеди средства додека петтиот по големина кинески производител на батерии Gotion не купи 25 отсто од акциите минатата година и не основаше заедничко вложување со InoBat за изградба на европски фабрики.
Во петокот, InoBat објави инвестиција од 100 милиони евра во Серија Ц, со што вкупниот износ на инвестиција ќе достигне повеќе од 400 милиони евра.
Само неколку недели по колапсот на Northvolt, инвестицијата покажува дека европските проекти за батерии за електрични возила сè уште можат да привлечат пари.
Но, наместо независна европска индустрија, идната норма би можеле да бидат заеднички вложувања кои се потпираат на доминацијата на Кина на пазарот на батерии, велат аналитичарите.
Како пример, покрај заедничкото вложување помеѓу Gotion и InoBat (GIB), тие го наведоа минатонеделниот договор меѓу Stellantis и кинеската CATL.
Во 2023 година, Gotion произведе околу 150 гигават часови (GWh) номинален капацитет на батеријата, доволно за 1,5 до 2 милиони електрични возила. Аналитичарот на Morningstar, Винсент Сан предвидува дека овој капацитет треба да достигне 270 GWh во 2025 година, што би го надминало сегашниот европски капацитет.
Викрам Гуринени, главен извршен директор на индискиот производител на батерии Амар Раџ, главен инвеститор во Серијата Ц на InoBat, рече дека неуспесите на стартапите како Northvolt и Biritshvolt ги принудиле производителите на автомобили да бараат доказ за квалитетот на батериите бидејќи не сакаат да ги ризикуваат своите програми за електрификација.
InoBat има пилот производствена линија за производство на батерии со високи перформанси во Voderady, Словачка, а исто така ќе биде „европско лице“ на Gotion за поголемите фабрики.
Northvolt собра повеќе од 10 милијарди долари инвестиции, но не успеа во својот план да започне масовно производство на батерии за автомобили и да стане конкурент на кинеските искусни и богати компании како BYD и CATL. Поради ова, инвеститорите почнаа да ги преиспитуваат другите проекти поврзани со батериите.
Најмалку осум компании ги одложија или ги напуштија европските проекти за батерии оваа година, вклучително и заедничкото вложување помеѓу Stellantis и Mercedes-Benz.
Европскиот капацитет за производство на батерии падна за 176 GWh оваа година, покажуваат податоците на Benchmark Minerals.
Експертизата на Gotion му помага на InoBat да ги реши проблемите, рече извршниот директор Бочек, додавајќи дека тоа „им помага да се движат побрзо и да заштедат пари“.
Тој рече дека европските производители на автомобили со високи перформанси, вклучително и Ferrari, моментално ги тестираат батериите на InoBat, кои ќе се произведуваат во голема фабрика во Водеради, но во мали количини и со високи маржи.
Заедничкото вложување GIB моментално е фокусирано на производство со голем обем и ниска маржа и ја користи позицијата на Словачка како четврти најголем производител на автомобили во Европа и нејзината близина до германските, чешките и унгарските фабрики за автомобили.
Покрај тоа, GIB планира да изгради гигафабрика од 1,2 милијарди долари од 20 GWh во Словачка за снабдување со батерии за 200.000 автомобили годишно од 2027 година за Volkswagen, кој, пак, поседува 24,45 отсто од Gotion.
Дел од финансиите на InoBat, поточно 214 милиони евра, доаѓаат од словачката влада. Енди Лејланд, ко-основач и експерт за синџирот на снабдување во SC Insights, рече дека инвеститорите и производителите на автомобили бараат „да ги намалат ризиците во производството“.
„Кинезите го совладаа масовното производство со ниска цена, па ако сакате батерии, азиските производители на батерии најверојатно ќе ги направат“, рече тој.
