УЕФА размислува за сериозни промени во квалификацискиот систем за Светското првенство во 2026 година, пишува Diario As.
На следното Светско првенство во САД, Мексико и Канада за прв пат во историјата ќе има 48 репрезентации, што значи дека од Европа наместо досегашните 13, ќе одат 16 репрезентации.
Досега квалификациите се играа во неколку формати, а последните за Мундијалот во Катар беше во десет групи со по пет-шест репрезентации. Победниците од групите одеа директно на Мундијал, додека десетте второпласирани и две репрезентации од Лигата на нации играа баражи со кои даваа уште тројца учесници преку три финални мини-турнири.
За очекување беше УЕФА, која деновиве ќе го објави конечниот квалификациски формат, да го остави бројот на групите, па второпласираните или барем шесте најдобри второпласирани да одат директно на Мундијалот. Тоа би го убило интересот за квалификациите бидејќи на најсилните репрезентации многу би им се олеснило одењето на Мундијал, па во Нион размислуваат за нов систем.
Според новата идеја, квалификациите би се играле во 12 групи со по четири или пет репрезентации, а директно на Светско првенство би оделе само победниците од групите заедно со четирите најдобри второпласирани репрезентации. Со тоа би се избегнало играње дополнителни баражи, а самите квалификации би траеле значително пократко.
Ова би овозможило повеќе натпревари во Лигата на нации, што е главната идеја на УЕФА. Според досегашниот формат, во финалниот фајнл-фор на Лигата на нации играат само победниците од групите, додека според новата идеја во финалето би имало осум репрезентации или по две од секоја група.
Diario As пишува дека засега нема да има промени во однос на квалификациите за Европските првенства, како и на самиот турнир.
Наводно имало идеја да се прошири ЕУРО од 24 на 32 репрезентации, но тој предлог беше одбиен од федерациите членки на УЕФА. Што се однесува до Русија, репрезентацијата уште има забарана од УЕФА и не се очекува да биде во квалификациите за Светското првенство во 2026 година.