Данска денеска пријави истекување на гас од гасоводот Северен поток 2, што од Русија оди кон Европа под Балтичкото Море, па оцени дека постои опасност за поморскиот сообраќај.
Данскиот оператор на гасоводот Северен поток 2 потврди за истекувањето откриено југоисточно од данскиот остров Борнхолм во Балтичкото Море.
Иако овој гасовод не се користи за увоз на гас, тој сепак е наполнет, јави новинската агенција dpa.
Портпаролот на Северен поток 2 изјави дека е забележано губење на притисокот во цевките рано изутринава и оти веднаш се информирани надлежните тела во Германија, Данска, Шведска, Финска и во Русија.
„Моментално разменуваме информации со надлежните тела за да ги разјасниме фактите“, се наведува во соопштението.
