Актерот и музичар Џаред Лето откри дека ќе ја игра улогата на Енди Ворхол во нов филм за уметникот.
Контроверзниот Лето ја сподели веста преку профилот на Instagram.
„Да, точно е, ќе го играм Ворхол. Многу сум благодарен и возбуден за оваа прилика што ми е дадена“, напиша тој.
Лето потсети дека на 6 август му беше роденден на светски познатиот уметник и додаде дека „ни недостига и тој, и неговиот генијален ум“.
Ова е единствената информација за филмот позната досега.
На почетокот на април Лето ја шокираше јавноста со изјавата дека бил на медитација две недели без средства за комуникација и дека поради тоа немал поим дека во светот се шири пандемијата на коронавирус.
Енди Ворхол (1928-1987) бил американски сликар, режисер, издавач и водечка фигура во поп арт движењето. Во текот на 70-тите и 80-тите години на 20. век, Ворхол е главно познат по неговите масовно произведувани портрети на поп икони како Елвис Присли, Мерилин Монро, Мао Це Тунг и др. Во истиот период тој издава и 3 книги, од кои најпозната е „Филозофијата на Енди Ворхол: од А до Б и назад.“
