Македонскиот бундеслигашки вундеркинг го постигна својот деби гол во дресот на Штутгарт запечатувајќи ја победата на гостувањето во Дрезден.
Дарко Чурлинов почна од гостинската клупа и влезе во игра во 57. минута на местото на Филип Ферстер. Штутгарт веќе водеше со 0:1 со голот на Хамади Ал Хадиуи уште од 18. минута.
На две минути пред крајот Дарко начека една одбиена топка и со брза реакција од прва ја смести во домашната мрежа.
Ова за него беше за четврти настап во дресот на Штутгарт откако зимава се пресели од редовите на Келн. Во четвртокот ги одигра последните 13 минути во дербито дома со Хамбургер (3:2), а на првите два натпревара по продолжувањето на сезоната не беше воопшто во составот.
Штутгарт по некомплетното 29. коло е втор на табелата со 51 бод, два повеќе од Хамбургер и 5 помалку од лидерот Арминија која има и натпревар помалку. Тимот на Дарко се бори за враќање во Бундеслигата и за такво нешто треба да остане помеѓу првопласираните две екипи.
