Поп-ѕвездата Џастин Тимберлејк вчера објави јавно извинување до поранешната девојка Бритни Спирс и пејачката Џенет Џексон велејќи дека „потфрлил во минатото“.
Тимберлејк се обрати преку неговиот Instagram профил по критиките на социјалните мрежи и медиумите оваа недела во врска со интервју дадено пред 20 години во кое тој зборуваше за неговиот сексуален живот со Спирс, кога и двајцата беа на врвот на својата кариера.
Реакцијата следеше по емитувањето на ТВ документарецот „The New York Times Presents: Framing Britney Spears“ за подемот и падот на пејачката.
Документарецот ја потсети јавноста на несоодветните медиумски појавувања на Тимберлејк во кои тој вулгарно зборуваше за нивниот сексуален живот.
Тимберлејк и Спирс беа во врска околу три години пред нагло да раскинат во 2002 година.
Пејачката еднаш изјави дека била девица кога влегла во врска со Тимберлејк и дека сака да ја изгуби невиноста во брак со саканата личност.
Во едно интервју, Тимберлејк на многу грд начин откри дека тој и пејачката имале секс за време на врската и ја напишал песната „Cry Me a River“ во која тој имплицира дека Спирс го изневерувала во врската.
Тимберлејк со години го следат обвинувања дека не презел доволно одговорност за инцидентот на Супербоул во 2004 година кога откина парче од облеката на Џенет Џексон за време на нивниот заеднички настап, што резултираше со разголување на десната дојка на пејачката.
„Поточно, сакам да им се извинам на Бритни Спирс и на Џенет Џексон, и на двете поединечно, затоа што ми се драги и ги почитувам тие жени и знам дека потфрлив“, напиша 40-годишниот Тимберлејк во објавата на Instagram.
Тимберлејк, кој моментално е во брак со актерката Џесика Бил, изјави дека му е жал што порано не зборувал за тоа.
„Разбирам дека во овие моменти и во многу други, потфрлив и имав корист од системот што одобрува мизогинија и расизам“, напиша тој.