Пејачот Џастин Тимберлејк испрати порака за поддршка до Бритни Спирс, неговата поранешна девојка, која води правна битка против татко ѝ Џејми Спирс за прекин на договорот со кој тој има права на одлучување за нејзиниот живот и кариера.
Бритни Спирс нема контрола врз нејзините финансии и кариерни одлуки од 2008 година наваму, согласно договор што во законите на САД се нарекува „conservatorship“. Според овој договор, таткото и адвокатот на Спирс менаџираа со нејзините финансии и личен живот, вклучувајќи забрана за посетители и комуникација со докторите во врска со нејзината терапија.
Тимберлејк се огласи на Твитер, каде го коментираше сведочењето на Бритни Спирс, со која порано беше во четиригодишна врска.
„После она што го видовме денес, сите треба да ја поддржуваме Бритни во овој момент. Без оглед на нашето минато, добро и лошо, без разлика колку одамна беше тоа“, напиша Тимберлејк.
„Она што ѝ се случи едноставно не е во ред. Ниту една жена никогаш не смее да биде ограничена да носи одлуки за сопственото тело. Никој не смее да биде затворен против нивна волја... Нуту некогаш да бара дозвола за пристап до сѐ она за кое толку напорно работела“, продолжи тој.
"Јас и Џес ѝ испраќаме љубов и апсолутна поддршка на Бритни. Се надеваме дека судовите и нејзиното семејство ќе го поправат тоа и ќе ја остават да живее како што сака“, рече музичарот и актер.
Тимберлејк и Бритни Спирс беа во врска од 1998 до 2002 година. Тој сега е во брак со актерката Џесика Биел.
