Манчестер Јунајтед уште еднаш не успеа да извојува победа против екипа од таканаречената Голема шесторка во Премиер лигата, откако синоќа одигра без голови против Челси.
Во својот седми натпревар сезонава против некој великан тимот на „Црвените ѓаволи“ сѐ уште нема победа. Синоќа на гостувањето на „Стемфорд Бриџ“ мрежите мируваа и двата тима ги поделија бодовите.
Голманот на Јунатед, Шанецот Давид де Хеа, е свесен дека титула не се освојува само победувајќи ги условно кажано помалите екипи, туку треба да се покаже сила и против Големата шесторка.
„Мислам дека ремито е во ред, но доколку сакаме да направиме нешто повеќе и да освоиме некој трофеј, или поточно да ја освоиме Премиер лигата, мора да ги победуваме и овие тимови“, рече тој во интервју за MUTV.
„Немавме многу шанси, не ги создававме. Веројатно она што ни недостасуваше беше оној последен пас. Имавме добри контранапади, но завршницата, она последно додавање не беше на ниво. Барем се браневме добро“.
Неговиот тим успеа вкупно 4 пати да упати удар кон противничкиот гол, тоа не беа некои сериозни шутеви. Домаќинот, пак, 6 пати го натера Де Хеа да интервенира.
„Ниту Челси немаше многу шанси. Имаа некои две шанси, но добро се справивме. Дадовме сѐ од себе, едноставно не беше доболно, да бидам искрен“, заврши Де Хеа.
Манчестер Јунајтед и натаму е на 2. место, но сега има дури 12 бодови заостанување зад водечкиот Манчестер Сити кој веќе со една рака го има зграпчено трофејот.