Целиот фудбалски свет мислеше дека фудбалерите на Торино ќе триумфираат над физички и емотивно исцрпената Аталанта по историскиот успех и освојувањето на Лига Европа, со што за прв пат во историјата на Италија ќе ѝ обезбедеа шест претставници во Лигата на шампионите.
Меѓутоа, тоа не се случи!
Тимот од Бергамо победи и сигурно ќе ја заврши сезоната, без разлика на одложениот натпревар против Фиорентина, на четвртото место пред Болоња, а со тоа Рома остана без пласман во елитното европско натпреварување.
„Не е виновна Аталанта што не се пласиравме во Лигата на шампионите, туку ние самите. Моите играчи на последниот натпревар против Емполи дојдоа со батериите при крај и заслужено загубивме, додека тимот од Бергамо покажа како се игра. Тоа треба да биде модел за сите нас“, изјави тренерот на Рома, Даниеле Де Роси.
Шефот на стручниот штаб на римјаните рече дека очекува неговиот тим да извлече поука од оваа сезона и во следната да биде многу подобар и поконкурентен за титулата.
„Постигнав многу успеси како фудбалер со Рома, а сега сакам да го направам тоа како тренер. Знам дека нема да биде лесно, но пресреќен сум што имам можност да го работам она што го сакам во клубот што го сакам и ќе дадам сѐ од себе за тоа да се оствари. Треба само да ја направиме вистинската стратегија и сигурен сум дека ќе освоиме трофеи“, изјави Де Роси.
