Кошаркарите на Денвер Нагетс продолжија со серијата порази, па ноќеска го претрпеа четвртиот последователен пораз и тоа од Торонто Репторс.
Денвер беше поразен во Канада со 125:110 и покрај уште една одлична партија на Никола Јокиќ.
Јокиќ натпреварот го заврши со 28 поени (10/13 од поле), 8 скока и 7 асистенции, но стана и предмет на потсмев поради обидот да ја „напумпа“ статистиката.
Имено, кон крајот на натпреварот, кога веќе беше јасно дека Денвер ќе забележи нов пораз, Јокиќ на секој начин се обидуваше да оствари трипл-дабл учинок, а при една акција имаше чист пат до кошот, но реши да се обиде да му асистира на соиграч.
Не требаше многу време за да почнат да кружат снимки од неговото неуспешно додавање на социјалните мрежи, а многумина отидоа дотаму што ја доведуваат во прашање неговата трка за МВП.
Да потсетиме, Јокиќ е двапати последователен МВП на лигата, а во последниот месец во НБА влезе како лидер во трката со Јанис Адетокунбо и Жоел Ембиид.
Заедно со Јокиќ, кај Денвер единствен расположен за игра беше Мајкл Портер со 23 поени, додека на другата страна маестрален беше Фред ВанВлит кој натпреварот го заврши со 36 поени.
Резултати:
Шарлот Хорнетс - Кливленд Кавалирс 104:120
Вашингтон Визардс - Детроит Пистонс 117:97
Торонто Репторс - Денвер Нагетс 125:110
Њу Орлеанс Пеликанс - Лос Анџелес Лејкерс 108:123
Оклахома Сити Тандер - Бруклин Нетс 121:107
Сан Антонио Спарс - Орландо Меџик 132:114
Феникс Санс - Милвоки Бакс 104:116
Портланд Треил Блејзерс - Њујорк Никс 107:123
Табела:
