Комитетот за контрола при Германската фудбалска асоцијација ќе отвори истрага поради тоа што некои играчи за време на натпреварите изразија поддршка за протестите во САД.
ДФБ ќе ги испитува потезите на Џејдон Санчо, Ашраф Хакими, Маркус Тјуран и Вестон МекКени кои изминатиов викенд изразија поддршка за масовните протести поради убиството на Џорџ Флојд.
Откако го постигна првиот од своите три гола на вчерашниот натпревар против Падерборн, Санчо од Борусија Дортмунд под дресот откри маица со испишано „Justice for George Floyd“ (Правда за Џорџ Флојд) поради што и доби жолт картон од главниот судија.
Истото потоа го повтори и на неговиот соиграч Ашраф Хакими кога зголеми на 1:4, па и тој пожолте.
Неколку часа претходно слично се случи и на натпреварот на имењакот од Менхендладбах против Унион. Таму Французинот Маркус Тјуран штом постогна гол клекна на колена поклонувајќи се, а на раката носеше лента со истиот натпис.
Порака истакна и Американецот Вестон МекКени, иако тој не постигна гол за својот Шалке 04.
„Управата за контрола на ДФБ ќе отвори истрага за оние настани во наредните денови“, изјави претседателот на комисијата, Антон Нахрајнер.
Според правилата на ДФБ, забрането е истакнување на вакви пораки.
Санчо со пораката дури и се пофали на својот Twitter профил пишувајќи: „Прв професионален хет-трик. Слаткогорчлив момент за мене лично бидејќи постојат поважни работи на светот денес кои мора да ги истакнеме и да ги промениме. Мора да бидеме обединети како еден и да се бориме за правда. Заедно сме посилни! #JusticeForGeorgeFloyd“.
Стратегот на тимот од Менхенгладбах, Марко Розе, го поздрави потегот на неговиот играч: „Маркус направи потег. Тој даде пример против расизмот кој сите ние го поддржуваме“.