Во рамките на 21. Моден викенд Скопје што сезонава се одржува во дигитална верзија, беа прикажани новите колекции на домашните дизајнери преку вибрантни и модерни лукбук фотографии и модни филмови, под мотото „Ветрот носи убаво време“.
Детално ги анализиравме колекциите на Евгенија Зафировска, Блерта Османи, KTN, Terziya и Стефанија Насеска, а нѐ заинтригира и колекцијата на пролет/лето 2020 на Guess, прикажана преку стајлинзи што ги подготви Даниела Ѓуровска.
Поранешна блогерка, а сега дипломиран дизајнер на отсекот ДИО на ТМФ, Ѓуровска ја имаше можноста да биде дел од приказната МВСК и на писта, и во бекстејџ и во први редови. Нејзината естетика суптилно провејува низ стајлинзите што ги подготви за новата колекција на Guess, а соработката во рамките на Моден викенд Скопје покажува дека МВСК како платформа продолжува да ги поддржува модните креативци во различни области и дејности.
Инспирацијата за колекцијата доаѓа од ултра гламурозниот Беверли Хилс. Моделите се во пастелни тонови со изразена силуета, полни со енергија и разиграност. Кај мажите пак, боите се јаки, кроевите храбри со доза на ретро елементи и интересни принтови за свеж, младешки изглед. Водена од оваа вибрантност, Ѓуровска состави неколку носливи, лежерно-шик изгледи преку кои есенцијално ја претстави колекцијата достапна во Skopje City Mall.
„Сеќавајќи се на едни поинакви изданија на Mодниот викенд Скопје би рекла дека секоја промена на крајот на денот е освежување и вложениот труд треба да се цени. Кога би се навратила на блогерските денови, учествата како моден дизајнер па сѐ до денес како стилист на Fashion group за модниот едиторијал на Guess, се радувам на можноста на овој или оној начин веќе неколку сезони да бидам дел од МВСК“, изјави Дани за Kajgana.com.
Дани Ѓуровска (Фото: Ерина Богоева)
„Модната индустрија нуди бесконечно многу можности. Во последно време стилизирањето е она што ја буди мојата имагинација и се трудам да покрај тоа што стајлингот би го отсликал брендот, ја преточам и својата естетика низ комбинациите кои на некој начин го интерпретираат мојот личен стил. За самото виртуелно прикажување на ревиите сметам дека се потврди моќта на социјалните медиуми, иако во овој случај бевме приморани за тоа. Креативноста, добрата организација и соработка секогаш ќе вроди со успех.“
Шминка: Farmasi и Марија Лазарова
Фризура: Revlon Professional
Фотографија: Света Богова Јовановска
Стилист: Даниела Ѓуровска
Кастинг: Виктор Цветановски
Модели: Филип Додевски, Aндријана Илиоска, Александра Бошнакоска @ Podium Model Agency
Во соработка со: Skopje City Mall
Поддржано од: Lenor
Дигитален партнер: A1 Македонија