Живот на социјална дистанца. И мода на социјална дистанца. Тоа го налага новата реалност во која живееме, но се чини модата со сите нејзини елементи никогаш не ни била поинтимна.
Џагорот меѓу ревии на Модниот викенд Скопје можеби го нема, но тркалото на модната индустрија продолжува да се врти и да создава приказни. Колекциите што дизајнерите неуморно ги подготвуваа сега може сите да ги видиме во „виртуелниот прв ред“ и уште подобро – на приватна презентација, со лаптоп или телефон пред себе. Сите сме публика на дигиталниот Моден викенд Скопје, а во овој циклус имаме нов бренд за кој ќе џагориме, барем во пораки и коментари на Instagram ако не на пауза меѓу ревии.
Трите сестри Китановски застанаа зад семејниот бренд KTN и се претставија со првата колекција FemmEPIRE што недвосмислено кажува за каква жена креираат. Првенчето на KTN носи мирис на Париз и голем ентузијазам од трите креативки. Токму ентузијазмот и јасната визија се најсилните адути на KTN. Низ креациите се чувствуваат силни и можеби сѐ уште недоволно сплотени изрази, но естетиката е недвосмислена: основата е класична париска елеганција канализирана во современ израз, со стремеж да остави траен печат.
Изборот да се претстават со колекција во која доминираат класичната бела и црна боја е паметен – тука е важна силуетата. Трите креативни енергии се јасно изразени преку различниот избор на материјали и текстури, на моменти вешто сплотени во една симбиоза, додека во некои креации дури и бунтовно спротиставени. Суптилното покажување кожа преку провидни изрези и длабоки шлицови ја прави нивната femme fatal моќна, но не и немилосрдна.
KTN е бренд што најавува дека ќе биде бескомпромисен кога станува збор за елеганцијата и ќе ја слави жената со сите нејзини моќи, на начин што ќе ја истакне нејзината верзија на убавината.
Шминка: Farmasi и Марија Лазарoва
Фризура: Revlon Professional
Фотографија: Света Богова Јовановска
Постпродукција: Aлекс Китановски
Кастинг: Виктор Цветановски
Модели: Александра Бошнакоска, Ангела Ѓоргиева, Андријана Илиоска, Пале Манева @ Podium Model Agency
Во соработка со: Skopje City Mall
Поддржано од: Lenor
Дигитален партнер: A1 Македонија
Сите колекции ексклузивно ќе бидат презентирани на социјалните мрежи, со премиера на снимените видеа и фотографии во партнерство со Skopje City Mall, а тука ќе ги читате критичките видувања за нив, низ призмата на модната блогерка и заменик-уредник на Kajgana.com, Александра Спасеска.