Продолжуваме со претставување на колекциите што ги донесе 21. Моден викенд Скопје оваа сезона, во дигитално издание. Наместо на писта, следиме мода преку социјалните мрежи, а нашите дизајнери покажуваат дека има што да чекаме секој ден со нетрпение.
Инспирирана од Студио 54 и дизајнот на Халстон, брендот Terziya носи една поинаква модна приказна од колоритните 70-ти: минималистичкиот њујоршкиот глам во целиот негов сјај.
Во еден сексапилен и возбудлив коктел, Terziya претставува колекција облека и накит со минималистички дизајн, елегантна и едноставна линија, но доволна за да ги заскокотка сетилата.
Накитот е 24- каратна позлата со жолто злато изработена во Бразил со полудраги и драги камења од проверено потекло, надополнет со кожа од питон на одредени примероци и природни кристали. Оваа колекција накит гаи посебна естетика на безвременска елеганција, истовремено носејки ги благодетите на природните камења. Начинот на изработка дозволува камењата да бидат во постојан допир со вашата кожа, со цел да го почувствувате влијанието и енергијата на каменот што сте го одбрале.
Креациите претставени во едноставна тробојна палета во која доминира кралицата на елеганцијата - црната боја - ја следат линијата на телото и зрачат со сексапил, покажувајќи дека дефинитивно „помалку значи повеќе“. Модниот коктел на Terziya е совршен за елегантни забави на покрив и ексклузивни коктел журки, па благодарение на безвременскиот шарм, ќе го најдат своето место во секоја сезона што следи.
Ваквиот формат на прикажување на колекциите оваа сезона дефинитивно му оди во прилог на брендот Terziya, овозможувајќи ѝ на модната публика внимателно и одблизу да го види мајсторски изработениот накит и да го почувствува ретро њујоршкиот шарм што колекцијата го носи. Музиката на Gloomié специјално изработена за ова видео, како и за сите други, совршено ја заокружува приказната.
Шминка: Farmasi и Марија Лазарова
Фризура: Revlon Professional
Фотографија: Амел Амед
Кастинг: Виктор Цветановски
Модели: Марија Давчевска, Aндријана Илиоска @ Podium Model Agency
Во соработка со: Skopje City Mall
Поддржано од: Lenor
Дигитален партнер: A1 Македонија
Сите колекции ексклузивно ќе бидат презентирани на социјалните мрежи, со премиера на снимените видеа и фотографии во партнерство со Skopje City Mall, а тука ќе ги читате критичките видувања за нив, низ призмата на модната блогерка и заменик-уредник на Kajgana.com, Александра Спасеска.