На вечерашната прес-конференција, претседателот на Државната изборна комисија Оливер Деркоски се извини за техничките проблеми во соопштувањето на прелиминарните резултати од денешните избори.
Деркоски рече дека во тек е обработката на првичните, неофицијални резултати од предвремените парламентарни избори и се извини за „проблемите со јавниот пренос на податоците“, но нагласи дека немало прекин и проблеми во обработката на податоците.
Во врска со недостапноста на официјалниот сајт каде требаше да бидат објавени прелиминарните резултати, тој рече:
„Најверојатно се работи за обид за надворешен напад, но не би сакал да шпекулирам“ и додаде дека не бил оневозможен преносот на информации.
По обработка на гласовите од 70% од избирачките места, Деркоски рече дека не сака да шпекулира и нагласи дека засега е „мртва трка меѓу политичките конкуренти“ и дека „во секој случај до крај на вечерта ќе имаме првични неофицијални резултати“.
