Голема чест за германскиот кошаркар по кого беше преименувана улица во Далас близу до салата каде што мина 21 НБА сезона.
Сега 41-годишен, Новицки замина во пензија по завршувањето на минатата сезона. Во Далас Маверикс дојде во 1998 од редовите на германскиот Вирцбург, клуб од неговиот истоимен роден град.
„Ова ми е некако нереално. По мојата прва сезона, веројатно не би именувале ни отпад по мене. Ова е поголемо од кошарката. Овде се работи за мојата врска со градот. Многу љубов имам добиено од жителите на Далас“, рече видно емотивниот Германец.
Граѓаните на Далас вечно ќе го паметат како еден од најзаслужните за титулата во сезоната 2010/11.
Градоначалникот Ерик Џонсон ги пофали граѓанските доблести на Новицки.
„Дирк стапи во контакт со мене лично да ме праша како би можел да помогне кога градот беше погоден од торнадо. Тој и Клејтон Кершо (бејсбол фрлач на Лос Анџелес Доџерс) дојдоа во нашиот прифатен центар да ги поздрават градските работници кои непрекинато беа на должност“.
Улицата „Новицки Веј“ досега се викаше „Олив Стрит“ сместена во блокот 2900-3000 блиску до салата „Американ Ерлајнс Сентр“ каде што од 2001 настапува Далас Маверикс.
