На пазарите на валути се зголеми вредноста на доларот во однос на кошничката на валути.
Индексот на доларот, кој ја покажува вредноста на американскиот долар во однос на другите шест најважни светски валути, утрово се движи околу 105,05 поени, додека во петокот навечер изнесуваше 104,95 поени.
Истовремено, курсот на доларот во однос на јапонската валута порасна за околу 0,5 отсто, на 153,45 јени.
И американската валута зајакна во однос на европската, па цената на еврото се лизна на 1,0715 долари, додека во петокот вечерта беше 1,0718 долари.
Цените на нафтата, пак, паднаа, откако минатата недела пораснаа за околу 1 отсто. Цената на барелот на лондонскиот пазар утрово се лизна за 0,38 отсто, на 73,60 долари, додека на американскиот пазар цената на барелот се намали за 0,48 отсто, на 70,05 долари.
Цените на акциите утрово паднаа на повеќето азиски берзи бидејќи инвеститорите не веруваат дека новите стимулативни мерки ќе го забрзаат растот на кинеската економија колку што се очекуваше, додека доларот благо порасна во однос на кошницата валути.
Азискиот индекс MSCI беше во минус од 0,2 отсто во 07:00 часот.
Истовремено, на токиската берза индексот Nikkei зајакна за 0,1 отсто, додека цените на акциите во Шангај, Австралија, Јужна Кореја и Хонгконг паднаа меѓу 0,1 и 1,9 отсто.
Падот на азиските берзи се должи на низата послаби од очекуваното кинески економски податоци објавени во текот на викендот.
Дополнително, во петокот заврши седницата на кинескиот Конгрес на која беше прифатен стимулативен пакет вреден речиси 1.400 милијарди долари за санација на долговите на локалните самоуправи и стабилизирање на економскиот раст.
Но, пакетот ги разочара оние инвеститори кои се надеваа на директна инјекција на пари во економијата.
„Пакетот е разочарување за оние кои очекуваа огромни фискални трошења, но тоа беше нереално. Целта на политиката е да се постигне целната стапка на раст на бруто домашниот производ од околу 5 проценти“, пишуваат аналитичарите на Macquarie Bank во својот осврт на состојбата на пазарот.
Покрај тоа, на кинеските берзи се тргува претпазливо бидејќи новиот стар американски претседател Доналд Трамп најави зголемување на царините за увоз на кинески производи.
А зголемувањето на царините може да предизвика одговор од Кина, па повторно, како и во претходниот мандат на Трамп, може да дојде до зајакнување на трговските тензии меѓу двете најголеми светски економии.
Токму затоа, азиските инвеститори не беа импресионирани од новите рекордни достигнувања на берзанските индекси на Волстрит во петокот.
