Познато е дека Србите соборија еден F-117 за време на бомбардирањето на НАТО, но досега беше непознато дека бил погоден и втор „невидлив“ борбен авион.
Американскиот портал The Drive наведува дека деталите за тоа што се случило со другиот авион станале познати дури неодамна, а пензионираниот потполковник на американското воено воздухопловство и поранешeн пилот на F-117, Чарли „Туна“ Хајнлajн, лично потврди во подкастот Afterburn она што многу години беше само гласина.
„Нашата противвоздушна одбрана успеа да погоди друг стелт-авион, но тој сепак успеа да се врати во базата во Германија“, пишува српски Новости.
Точниот датум кога се случило погодувањето не е познат, но сигурно е дека овој настан се случил во текот на април 1999 година по соборувањето на првиот F-117.
Во текстот се потсетува дека на четвртиот ден од бомбардирањето на НАТО, припадниците на Третата ракетна дивизија на 250-та ракетна бригада на Југословенската противвоздушна одбрана го соборија F-117А, американско „чудо од авион“ со стелт-технологија, кој стекна репутација на „невидлив“ во Заливската војна во Ирак.
Пилотот Дејл Зелк беше безбедно евакуиран од американските сили, а неговиот авион заврши во полето во атарот на селото Буѓановци во близина на Рума.
Во своето сведочење, Хајнлајн опиша како бил погоден вториот F-117. Тој изјави дека два „невидливи“ авиони, придружени со авиони F-16, ја започнале акцијата над Белград од базата во Германија. Тој управувал со F-117, а кога биле над Нов Белград и двајцата „невидливи“ биле нападнати од ракети истрелани од српската ПВО.
„Погледнав десно кон небото над Белград и видов како се приближува огромна ракета. Изгледаше како Saturn V. Знаев дека мојот дечко број два е таму некаде. Потоа видов уште едно лансирање и силно светење, чад, а потоа и огнена топка како доаѓа кон мене“, рече тој.
Американскиот пилот наведува дека сепак успеал да ја избегне експлозијата на проектилот и соборување на неговиот авион со помош на автопилотот и да ја изврши својата мисија, односно да ја бомбардира поставената цел.
„На враќање, сепак, сфатил дека другиот авион е сериозно оштетен, но и двата авиона сепак успеаја да се вратат во базата“, објави Новости, цитирајќи објава на српски Курир.
