Шарл Леклер (Ферари) ја освои најдобрата стартна позиција за Големата награда на Мајами во синоќешните квалификации, односно петтата трка од оваа сезона, која е закажана за денеска.
Водечкиот возач на Светскиот шампионат во Формула 1 постигна најдобро време на квалификациите, а од патеката во Мајами помина нешто помалку од 5,5 километри за една минута, 28 секунди и 796 илјадитинки.
Инаку, Ферари ќе ги има двата болида во првиот стартен ред, имајќи предвид дека Карлос Сајнц Јуниор заостана 190 илјадитинки зад својот колега.
Холанѓанецот Макс Верстапен (Ред Бул) имаше за само пет илјадитинки побавен круг од Шпанецот, кој од вториот ред ќе стартува со својот соиграч од Мексико, Серхио Перез.
Финскиот возач Валтери Ботас (Алфа Ромео) за 150 илјадитинки го надмина Британецот Луис Хамилтон (Мерцедес), чиј нов тимски колега и сонародник Џорџ Расел остана без настап во третиот дел од квалификациите, па ќе стартува дури од шестиот ред.
Да потсетиме, Леклер води по првите четири трки и има 86 бодови, а второпласираниот Макс Верстапен заостанува 27 бода зад него.
Трката за Големата награда на Мајами ќе започне вечерва во 21:30 часот по средноевропско време.
