Џон Мекафи, 75-годишниот творец на познатата антивирусна програма, е пронајден мртов во затвор во Барселона.
Шпанското министерство за правосудство во кратка изјава објави дека сè укажува на самоубиство. Неговиот адвокат Хавиер Вилалба за Reuters изјави дека веројатно станува збор за смрт со бесење.
Веста за пронаоѓање на телото стигна неколку часа откако Шпанија ја одобри неговата екстрадиција во САД, каде му се закануваа 30 години затвор поради неплатен данок. Тој беше уапсен минатата година во Шпанија и оттогаш се наоѓаше во затвор во Барселона.
Мекафи беше уапсен ден откако американското државно обвинителство објави дека има обвинение против него дека не пријавил милиони долари приход од промоции на криптовалути, консултантски услуги, конференции и права продадени за снимање на документарец за неговиот живот.
Според обвинението, Мекафи не плаќал данок во период меѓу 2014 година и 2018 година, а приходите му биле исплаќани на банкарски сметки и во криптовалута на туѓи имиња за да избегне плаќање на данокот. Американските власти преку Интерпол издадоа налог за апсење и побараа негово екстрадиција.
