Голманот на Милан, Џанлуиџи Донарума, даде големо интервју за Sky Sports Italia во кое нагласи дека сака да остане во Милан и да освојува трофеи.
Исто така го пофали влијанието на тренерот Стефано Пиоли и на напаѓачот Златан Ибрахимовиќ кој зимава се врати во Италија.
21-годишниот Донарума е еден од најталентираните голмани во светот, а лошите резултати на Милан во изминативе години постојано се спомнуваат како причина за негово можно заминување.
Сепак, Донарума нагласува дека тоа не е точно.
„Сакам да станам најдобриот голман и да освојувам што е можно повеќе титули со Милан. Сакам да освојам и Светско првенство, тоа исто така ми е на листата на приоритети“, рече Џиџи.
Милан лошо тргна во сезоната, но почна да се крева на нозе со доаѓањето на Златан Ибрахимовиќ. По паузата поради коронавирусот се една од најдобрите екипи во првенството и имаат добри шанси да ја уловат Рома на четири кола пред крајот. Рома има два бода повеќе и го држи петтото место кое води директно до Лига Европа.
„Задоволен сум од тоа како работиме во последно време. Благодарен сум на тренерот кој секогаш има убави зборови за мене, секогаш ќе давам се од себе за него, тој е прекрасна личност и прекрасен тренер. А Ибра, тој е човек-ѕвер, феномен. Ни дава многу и го слушаме. Ни дава дополнителна сила, што ни недостигаше, не сака да губи, дури и на тренинзи. Ни го јакне менталитетот“, вели Донарума.