Кошаркарот на НБА лигашот Далас Маверикс, Лука Дончиќ, изјави оти уживал во секој момент додека настапувал за репрезентацијата на Словенија, пренесуваат денеска американските медиуми.
Дончиќ ова лето играше за Словенија во квалификациите за Светското првенство 2023, а потоа и на ЕвроБаскетот на кој неговата репрезентација не успеа да ја одбрани титулата откако загуби во четвртфиналето.
„Се чувствувам добро, но по завршувањето на ЕвроБаскетот дневно спиев 13-14 часа. Успеав да се одморам. Со репрезентацијата на Словенија минав два месеца. Во тој период многу тренирав и имаше многу емоции“, им изјави Дончиќ на новинарите по враќањето во Далас.
„Настапите за репрезентацијата бараат многу одрекување. Понекогаш посакуваш да си на некоја плажа, а не на тренинг. Меѓутоа, уживав во секој момент играјќи за Словенија“, додаде Дончиќ.
Новата сезона во НБА лигата стартува на 18 октомври.
