Шест унгарски пратеници добија два месеца забрана за влез во парламентот на земјата, откако ја прекинаа седницата во вторникот поради усвојувањето на амандманот со кој се забранува одржување на Парада на гордоста во Унгарија.
Пратениците од либералната партија Моментум и независниот пратеник Акос Хадази протестираа палејќи димни бомби внатре во собраниската сала.
Тие ја прекинаа седницата откако мнозинството ја изгласа иницијативата на нелибералната влада на премиерот Виктор Орбан да се забрани секој јавен собир што го прекршува законот за заштита на децата, кој го ограничува пристапот до се што може да „промовира или прикажува отстапување од полот на раѓање, промена на пол или хомосексуалност“.
Критичарите го нарекоа законот хомофобичен.
„Во суштина, не сме изненадени“, изјави парламентарниот лидер на Моментум, Давид Бедо, за Politico.
„Очекувавме дека претседателот на парламентот Ласло Ковер, еден од блиските сојузници на Орбан, ќе нè удри со сета сила на партиската држава“, додаде тој.
На Бедо и на уште двајца пратеници им е забранет влез во парламентот во траење од два месеци, а платите ќе им бидат суспендирани на шест месеци.
