Дресот во кој аргентинскиот фудбалер Диего Марадона ги постигна неговите два најпознати голови е купен од анонимен купувач за 8,93 милиони долари, што е нов рекорд.
Марадона дресот го носеше во четвртфиналето на Светското првенство во 1986 година против Англија во Мексико и во него ги постигна двата гола кои му ја одбележаа кариерата.
Откако 19 години дресот беше изложен во Англискиот национален фудбалски музеј во Манчестер, беше ставен на аукција.
„Овој историски дрес е потсетник на еден важен момент не само во историјата на спортот, туку и во историјата на XX век“, изјави Брам Вактер од Sotheby's.
Крајната цена го надмина досегашниот рекорд за дресот на познатиот бејзбол играч Бејб Рут кој во 2019 година беше продаден за 5,64 милиони долари. Тој го носеше дресот во минатиот век, од 1928 година до 1930, кога играше за Њујорк Јенкис.
Марадона, кој го сметаат за еден од најдобрите фудбалери на сите времиња, почина во ноември 2020 година, на 60-годишна возраст.