Филипинскиот претседател Родриго Дутерте им се закани со затворска казна на граѓаните кои одбиваат да се вакцинираат против COVID-19 додека земјата води битка со коронавирусот со над 1,3 милиони заразени и повеќе од 23.000 смртни случаи.
– Вие одлучувате, или ќе се вакцинирате или одите во затвор, им рече претседателот Дутерте на граѓаните во телевизиско обраќање по извештајот за низок одговор на вакцинациите во главниот град Манила.
Заклучно со 20 јуни, 2,1 милиони луѓе се целосно вакцинирани на Филипините, што е многу мал напредок со оглед на тоа што целта на владата е да вакцинира до 70 милиони луѓе до крајот на годината, во земја со 110 милиони жители.
– Не ме сфаќајте погрешно, но земјата е во криза, јас сум револтиран од граѓаните кои не ја почитуваат својата влада, рече Дутерте.