Ефективноста на карантинот, полицискиот час и сите други рестрикции воведени поради COVID-19 сѐ уште се предмед на разни полемики, но затворањето на училиштата и бизнисите, рестрикциите за патување и забраната за групирање веројатно придонеле да узумрат два вида на грип.
Ова го тврди дел од експертската фела. Ако на почетокот на пандемијата стравувањата беа дека кога COVID-19 истовремено ќе удри по човекот заедно со сезонскиот грип ќе направи вистински хаос во болниците, ништо од тоа не се оствари. Причината - едноставна: сезонскиот грип речиси да го снема.
Задолжителното носење на заштитна маска, социјалната дистанца и други мерки првенствено воведени за заштита од COVID-19 се главните виновници што зимава грипот изостана. Во една студија објавена во STAT се вели дека изостанокот на сезонскиот грип годинава резултирал со тоа два негови вида најверојатно да изумрат.
Подвид на H3N2 вирусот, како и варијанта на инфлуенца Б вирусот, не се забележани веќе повеќе од 12 месеци. „Веројатноста дека овие два вида се изумрени е голема“, пишува STAT.
„Шансата подвидот H3N2 да е засекогапш исчезнат е навистина голема, но, светот е сепак големо место“, вели Тревор Бедфорд, биолог од „Фред Хатчинсон“ центарот за истражување канцер во Сиетл.
„Тоа што никој не ги видел не значи дека се целосно исчезнати. Но, можно е и навистина да изумреле“, вели Флориан Крамер, експерт за грип во медицинското училиште „Маунт Сајнај“ во Менхетен.
Колку навистина овие видови на грип исчезнале ќе дознаеме единствено кога ќе запре COVID-19 и зимските месеци ќе ги поминуваме без никакви ограничувања.
