Се заоструваат рестриктивните ковид-мерки – полицискиот час наместо од 22 во наредните две недели ќе почнува од 20 часот, а од утре за гости се затвораат сите угостителски објекти, како и угостителскиот дел од обложувалниците. Од денеска се затвораат и фитнес салите, спортските и салите за вежбање и се забранува и организирање, одржување и учество на семинари, обуки, работилници, курсеви, конференции.
Новите рестриктивни мерки имаат за цел да се намали оптоварувањето на здравствениот систем, како и да се избегне потенцијално затворање за верските празници Велигден и Бајрам.
Одлуката за затворање ќе трае до 20 април 2021 година, а како што соопшти Владата по вчерашната седница, објектите кои вршат подготовка и продажба на храна може да продаваат преку онлајн или телефонска нарачка и да вршат достава на храна или самостојно подигнување на нарачката надвор од угостителскиот објект, преку пулт.
Целосна забрана да примаат гости ќе имаат и хотелите, мотелите, хостелите, пансионите и други објекти за сместување или на бензински станици кои имаат делови за служење храна, а исклучок се рестораните во склоп на хотелите, мотелите, хостели и пансиони за оние лица кои се сместени како гости, како и угостителскиоте објекти на Меѓународниот Аеродром Скопје и Аеродромот „Св. Апостол Павле“ во Охрид.
Обложувалниците ќе можат да работат без да примаат гости во своите објекти и уплатите да ги вршат преку наплатен пункт.
Информирајќи за новите рестриктивни мерки, премиерот Зоран Заев, рече дека ова е најголемо оптоварување на здравствените систем од почетокот на пандемијата.
– Бројот на новозаразени постојано расте, бројот на починати од корона расте, досега здравствените работници се справуваа со предизвиците, но, сега постои сериозно оптоварување на здравствените работници кои деноноќно и со сите сили се во битката за спасување човечки животи, рече премиерот Заев.
Вчера беа регистрирани нови 37 починати лица, како и нови 301 случај на COVID-19 од направени 1.431 тестирање. Бројот на починати од почетокот на пандемијата достигна 3.977, а бројот на активни случаи изнесува 20.802. Вкупно биле заразени 135.167 лица.
Дополнителните рестриктивни мерки, според министерот за здравство Венко Филипче, сѐ со цел епидемиолошката слика дополнително да стивне.
– Се соочуваме со бран кој е предизвикан од мутација на вирусот која е различна во однос на карактеристиките кои вирусот и бранот го имаше во ноември. Имаме голем број хоспитализирани пациенти, лекувањето трае подолго отколку минатата година. Празниците кои доаѓаат дополнително може да ја комплицираат епидемиолошката ситуација. Во таа смисла се сите овие дополнителни рестриктивни мерки со цел епидемиолошката слика дополнително да стивне, истакна Филипче.
Заменик-министерот за здравство Илир Хасани, рече дека мерките се рестриктивни, но имаат за цел да се заштитиме и претстојните празници да ги поминеме во мир и спокој.
– Се наоѓаме на праг на големи верски пранзици, но свесни сте дека сме во тешка општа состојба. Размисливме проактивно. Се најдовме пред два избора: или ќе го ограничиме пост или ќе се затвораме за Бајрам или Велигден. Ако не носиме одлуки ќе се соочиме со затворање и за Бајрам и за Велигден. Се надеваме дека тоа нема да се случи и дека празниците ќе ги поминеме без големи ограничувања, рече Хасани.
По одлуката на Владата за затворање на угостителските објекти како дел од рестриктивните мерки за спречување на ширењето на COVID-19, Туристичко-угостителската комора при Сојузот на стопански комори побара итна финансиска помош за овој сектор, каде според нивните проценки без основни приходи ќе останат околу 30 илјади граѓани кои работат во овој сектор.
– Со оглед на моменталните услови, ја разбираме потребната од носењето на нови рестриктивни мерки кои треба да доведат до подобрување на состојбите на здравствен план. Но, во исто време апелираме дека е неопходно паралелно со тоа итно да се додели и посебна финансиска помош за субјектите кои поради одлуката затворањето ќе останат без било какви приходи. Финансиска поддршка е неопходна за да се обезбеди основна егзистенција и да не се изгубат овие работни места, вели Мартин Анѓеловски од Туристичко-угостителската комора.
Од опозициската ВМРО-ДПМНЕ, пак, оценија дека со објавените мерки паднале во вода сите тврдења дека состојбата е под контрола.
– Паднаа во вода сите нивни тврдења дека состојбата е под контрола, дека системот е добро организиран и дека нема потреба од нови мерки, како што изјавуваа пред само една недела, изјави пратеникот од ВМРО-ДПМНЕ Миле Лефков
Досега полицискиот час почнуваше од 22 часот, а угостителските објакти работеа до 21 часот. Одлуката за полициски час од 22 часот беше донесена на 9 март и почна да се применува од 10 до 22 март. Потоа беше донесена одлука тоа ограничување да важи до денеска, 6 април.
