На трупот на танкерот со нафта што е насукан на брегот на Маврициус се појавиле пукнатини, поради што постои опасност да се преполови. Тоа само би ја влошило оваа еколошка катастрофа од размери со кои островската земја досега се нема соочено.
Јапонскиот танкер MV Wakashio превезувал 4.000 тони нафта кога наишол на корален гребен во Индискиот Океан на 25 јули, каде се насука.
Излеаната нафта создаде дамка во водата што се гледа и од вселената. И покрај лошите временски услови, од танкерот беа испумпани 500 тони нафта, соопштија властите. Меѓутоа, вистинската еколошка катастрофа би можело да следи ако танкерот се преполови.
Маврициус е познат по коралните гребени, а туризмот е клучен за стопанството на островската земја која предупредува дека не е подготвена да се соочи со ваков проблем.
Горивото се превезува до брегот со помош на хеликоптери и уште еден брод на јапонската компанија Nagashiki Shipping. Франција од својот остров Реунион испрати воен авион со опрема за контрола на загадување, додека Јапонија отстапи тим од шест лица за помош во спречувањето на катастрофата.