Само неколку часа откако сите светски новински агенции пренесоа дел од интервјуто што Алексеј Навални го даде за германски Spiegel, стигна одговор од Кремљ.
Водечкиот руски опозиционер и најжестокиот критичар на Кремљ во интервјуто рече дека нема друг став освен дека рускиот претседател Владимир Путин стои зад обидот за негово труење.
Од Кремљ веднаш пристигна контра-обвинение.
„Западните разузнавачки агенции, а особено агентите од американска ЦИА, работат со водачот на руската опозиција, Алексеј Навални“, рече портпаролот на Путин.
„Не станува збор за тоа дека пациентот (Навални) работи за западните разузнавачки служби, туку дека тие служби работат со него“, објасни Дмитриј Песков.
„Може да бидам уште попрецизен, деновиве специјалисти на Американската централна разузнавачка агенција работат со него“, додаде Песков.
Претходно денеска, се огласи и претседателот на Долниот дом на руската Дума, кој го обвини Навални дека работи за западните тајни служби и рече дека рускиот претседател Владимир Путин не стои зад неговото труење, туку дека му го „спасил“ животот.
„Навални е бесрамен и негативец. Путин му го спаси животот... сосема е очигледно дека Навални соработува со специјалните служби и властите на западните земји. Тој работи во нивен интерес", рече претседателот на Думата, Вјачеслав Володин.
За потсетување, на Навални му се слoши за време на лет додека беше на турнеја низ Сибир и веднаш беше префрлен во болницата во Омск, каде падна во кома. Руските лекари рекоа дека се сомневаат во метаболичко нарушување и ја отфрлија секоја можност Навални да бил отруен.
Ова е официјалната верзија, а во неофицијалната, која се појави во медиумите и на социјалните медиуми, стои дека руските лекари ја одложиле дозволата за пренесување на Навални во германската болница Шарите, со цел да се изгубат трагите од отров од неговата крв.
Reuters разговараше со болничарите кои први го пречекаа Навални во Омск и кои презентираа загрижувачки информации за тоа како и кој ја прикрил суштинската информација - нивото на шеќер во крвта на Навални.
Кога бил префрлен во Германија, тамошните лекари рекоа дека имаат докази дека Навални бил отруен со нервниот агенс „новичок“.
Москва негира апсолутно сè, без оглед на фактот дека Русија е под притисок да ги испита и открие причините зошто и како падна во кома најжестокиот критичар на Кремљ.