Челниците на кошаркарската Евролига наводно размислуваат за продолжување на сезоната, а во нивниот план е сите 78 натпревари да се одиграат во еден град во кој има две арени, пишува шпанскиот весник El País.
На тој начин, сезоната би завршила за пет недели. Пред да се тргне во реализација на идејата, екипите би добиле две недели за подготовки.
Тренерите, играчите и тимскиот персонал би требало да се јават во клубовите во што пократок рок и по 14 дена во самоизолација да се вратат на терен на подготовки за продолжување на сезоната.
Како градови кандидати за домаќини, весникот ги наведува Атина, Истанбул и Москва.
Сето ова се претпоставки за плановите на раководството на кошаркарската Евролига. Колку од ваквите пишувања на El País ќе бидат реализирани, останува да се види со оглед дека пандемијата на коронавирусот е во полн ек и сигурно ќе потрае уште одреден период.
Во меѓувреме, Асоцијацијата на клубови и Синдикатот на професионални играчи од Грција донесоа одлука да се стави крај лигата во Грција. Уште не е јасно дали лидерот Панатинаикос ќе биде прогласен за шампион.
Крај на кошаркарската сезона досега прогласија и Украина (шампион Днипро), Литванија (Жалгирис), Хрватска (уште не е прогласен првак), Белгија (Остенде), Словенија (уште не е прогласен првак) и други земји, како и регионалната ВТБ лига.