Претседателот на Ел Салвадор, Најиб Букеле, најави дека 10.000 припадници на безбедносните сили ќе бидат распоредени во предградијата на Сан Салвадор, област позната како упориште на бандите, кои ќе започнат нови активности во борбата против бандите.
Овој потег дојде како продолжение на ескалацијата во борбата против криминалните организации која трае од март 2022 година.
„Општината Сојапанго е целосно опколена. 8.500 војници и 1.500 безбедносни агенти го опколија градот, а полициските и армиските тимови имаат задача да ги извлечат еден по еден членовите на бандата кои се уште се таму“, рече претседателот на државата.
Како што можеше да се види на снимките што ги објави претседателот, војниците носат пушки, шлемови и панцири.
„Општината што ја опколија има 300.000 жители и претходно важеше за една од оние каде што беше невозможно да се спроведе законот. Откако го започна својот план против банди, Букеле нареди апсење на повеќе од 50.000 луѓе осомничени дека се поврзани со активностите на криминалните групи“, пишува Reuters.
Меѓу другото, Букеле имаше порака и за сите останати граѓани на Ел Салвадор.
„Обичните граѓани немаат од што да се плашат и можат да продолжат да живеат нормално. Ова е операција против криминалци, а не против чесни граѓани“, рече Букеле.