Електричниот Abarth 500 ќе се појави на пазарот во 2023 година и ќе биде првиот модел со високи перформанси по Abarth 124 GT од 2018 година.
Новиот модел ќе го означи почетокот на Abarth како електричен оддел на FIAT за автомобили со високи перформанси. Другите модели исто така ќе бидат подложени на третман со Abarth, а шефот на брендот, Оливје Франсоа, изјави за Autocar дека Abarth во секој момент ќе има еден до три модели.
„Пред година и пол реков дека нема да биде тешко да се произведе Abarth-овата верзија на електричниот модел 500. Електричните автомобили се веќе забавни за возење, а добрата вест е што веќе работиме на тоа. Кога сѐ ќе биде официјално нештата брзо ќе се развиваат. Лошата вест е што сепак е потешко да се реализира проектот отколку што мислев. Ако сакате да направите вистински Abarth, тогаш тоа не е истиот електричен погон. Кога ќе ја добиете силата и вртежниот момент што ги сакате, тоа не е истиот погон, истиот менувач, истите сопирачки. Сѐ мора да се прилагоди“, рече Франсоа.
Тој рече дека во тек се последните тестови пред официјалната потврда за пристигнувањето на автомобилот.
„Ќе биде фантастично, звукот ќе биде многу интересен. Ќе можете да изберете дали автомобилот ќе биде тивок или не“, додаде тој.
Заедницата на обожаватели на Abarth ќе игра клучна улога во развојот на претстојните модели.
„Кога станува збор за маркетингот, брендот е тотално различен од FIAT. Фановите на Abarth нема да купуваат FIAT, и обратно. Ќе ја вклучиме заедницата во развојот, а социјалните мрежи се идеални за тоа“, рече Франсоа.
Електричниот FIAT 500 забрзува од 0 до 100 km/h за 9 секунди, достигнува максимална брзина од 150 km/h и има опсег од 320 km. Верзијата на Abarth најверојатно ќе ја достигне стотката за 7 секунди, додека максималната брзина ќе биде околу 160 km/h. Сепак, опсегот ќе биде малку помал.