BMW постојано се надминува себеси, а овојпат отиде и чекор подалеку од очекувањата, создавајќи го Motorrad Vision DC Roadster – најоптимистичкиот проект на две тркала кој некогаш излегол од компанијата од Минхен.
Електричниот мотоцикл беше во плановите на BMW веќе неколку години, а неделава конечно имаме шанса да видиме како изгледа, преку извештаите и фотографиите кои ги сподели германскиот гигант.
Во трендот на електрификација на моделите кои излегуваат од компанијата, BMW го претстави Motorrad Vision DC Roadster, електричен концепт мотоцикл кој веќе изгледа подготвен да ги тестира асфалтните патишта. Како и со сите претходни концепти, BMW не даде детали околу спецификациите и карактеристиките на моделот, и тоа ќе остане така додека компанијата не ја направи конечната верзија на мотоциклот која ќе се појави на пазарот.
Електрификацијата на одделот мотоцикли BMW ја започна во 2014 година, преку практичниот скутер C Evolution, а оттогаш продолжи надградувањето и подобрувањето на овој модел. Но, германскиот производител сакаше поголеми и поамбициозни проекти за нивниот оддел на мотоцикли, па две години подоцна го претстави концептот Motorrad Next 100, кој изгледа како да е излезен од стрипови. Само една година подоцна, беше претставен Motorrad Concept Link, кој изгледаше како футуристичка верзија на C Evolution.
Последниот адут на BMW, наречен Motorrad Vision DC Roadster, изгледа како да е подготвен за пат уште денеска, иако во моментов е само концепт.
Вооружен со стил и иновативен дизајн, Vision DC Roadster е мотоцикл кој со сигурност ќе ве натера да се свртите по него кога поминува покрај вас, а притоа е вистински „магнет“ за љубителите на ѕверовите на две тркала од BMW.
До некаде сличен на претходните концепти, DC Roadster јасно дава до знаење дека е производ на BMW, но со една нова, свежа визија за иднината и за она на кое е фокусирана компанијата во наредните години.