Времињата се менуваат.
Кен Олиса, претставник на кралицата Елизабета Втора во британската престолнина и првиот црнец кој ја извршувал оваа функција, откри за телевизијата Channel 4 дека разговарал за расизмот со членовите на кралското семејство откако бел полицаец во САД го уби Афроамериканецот Џорџ Флојд и рече дека кралското семејство поддржува движењето Black Lives Matter.
„Разговарав со кралското семејство за расното прашање, особено во последните 12 месеци по убиството на Џорџ Флојд“, рече тој за ТВ-каналот.
„Ова е жешка тема за разговор. Прашањето е, што друго можеме да направиме за да го поттикнеме општеството да ги отстрани овие пречки“, продолжи тој.
Тој додаде дека членовите на кралското семејство „страсно се грижат нивната земја да ги дели истите вредности“.
На прашањето дали Бакингемската палата го поддржува движењето Black Lives Matter, Кен Олиса одговори: „Да, целосно“.
Изјавата доаѓа неколку месеци по шокантните откритија на принцот Хари, внукот на кралицата Елизабета Втора, и неговата сопруга Меган, во интервју за Опра Винфри, дека неименуван член на кралското семејство коментирал за бојата на кожата на нивниот син Арчи.
Изјавата создаде раздор помеѓу младата двојка и остатокот од кралското семејство, а принцот Вилијам реагираше и посочи дека „тие во никој случај не се расистичко семејство“.
Кралицата рече дека е тажна поради тешкотиите што ги чувствува двојката и дека многу сериозно ги сфаќа обвинувањата за расизам.
