Македонската фудбалска репрезентација синоќа оствари тешко извојувана победа против аутсајдерот Малта и со планирани три бода го почна новиот циклус квалификации. Елиф Елмас е задоволен од победата, бидејќи, како што вели, тоа е најважно.
„Најважно е што победивме! Секогаш првиот натпревар е тежок, знаевме дека ќе биде тешко. Знаеше и Малта што ја очекува, но одиграа нивен фудбал, каков што ние не сме навикнати да гледаме од една таква мала земја. Сепак, за нас беше најважно да ги земеме трите бода и во тоа успеавме. Знаевме што значи да се почне со победа“, вели фудбалерот на Наполи, сезонава убедлив лидер во Серија А.
Елмас во 66. минута беше оној што го скрши отпорот на Малтежаните кога на асистенција на Миовски го отвори резултатот.
Со оглед на тоа што е најпознатото име во моментов во репрезентацијата, како да владее една атмосфера дека можеби од него се чека да игра главна улога на теренот. Уверува дека тоа не е така.
„Не чувствувам дека сѐ на мене се чека, сепак ние сме тим, прво гледам на тимот, тимската игра, тимскиот дух и тој да е на највисоко ниво“.
Кога беше досуден пенал за Македонија, од трибините и на малите екрани се доби чувство дека тројца се караат кој да го изведе. На крајот Алиоски тргна да шутира, но по интервенција на ВАР главниот судија ја промени одлуката и сепак никој не шутираше.
„За пенали не се караме, неважно е кој ќе шутне, кој ќе даде гол - за мене најважно е Македонија да победи. Ние не треба да ги гледаме нашите противници, кој што направил, знаеме од каков калибар и какво топ ниво се, треба сами да се гледаме и да одиме од натпревар во натпревар. Така да небитно е како завршиле, наше е ние да се гледаме. Ова ни беше тежок дуел и како прв - најважен. Се надевам дека расположението ќе се врати, до кое ниво не знам, ама знам дека треба да сме сите сплотени, да бидеме едно и да го играме тоа што го знаеме. А, самодовербата е на прво ниво и се надевам дека ќе остане и понатаму“, заврши Елмас.
За пеналите на пресот по натпреварот и селекторот Милевски демнантираше се играчите се карале, бидејќи, како што кажа, „однапред е одлучено кој шутира“.
