Доколку се реализира најавената позајмица на Кристијано Роналдо од Манчестер Јунајтед, Португалецот нема да може да го носи својот омилен број во Наполи бидејќи тој му припаѓа на нашиот Елиф Елмас.
Не е во прашање суета на македонскиот репрезентативец, кој веројатно радо би му го отстапил бројот на дрес на португалската ѕвезда, како што пред дваесетина години направи Иван Заморано кога на бразилскиот Роналдо му ја даде деветката, туку во прашање се строгите правила на Серија А.
Имено, правилата во Калчото велат дека штом еден играч влезе во записник на натпревар од Серија А со еден број, тој број мора да го носи до крајот на сезоната. Праволото не дозволува отстапки без разлика кој играч е во прашање.
Елмас сезонава беше во тимот на сите три натпревари, и тоа како резерва, а на сите влегуваше во игра во вториот дел. Седумката е негова до крајот на сезоната, освен ако до крајот на летниот преоден рок тој не си замине од Наполи. Во тој случај Роналдо може да го земе неговиот број, но тоа е малку веројатно дека ќе се случи.
Бројот 7 не само што му е омилен на Португалецот, туку од него тој изгради цел бренд препознатлив како CR7.
Засега нема ништо конкретно околу евентуалниот премин на Роналдо во Наполи, но она што го пренесоа италијанските медиуми е дека Наполи упатил доста непристојна понуда до Јунајтед која гласела позајмица, со тоа што „Црвените ѓаволи“ да му ја плаќаат целата плата на 37-годишниот напаѓач.