Дуелот на Џеноа и Наполи им припадна на гостите, а нашиот Елмас имаше и поништен гол.
Екипите на Горан Пандев и Елиф Елмас синоќа ги вкрстија копјата во натпревар од 31. коло во најдобрата италијанска лига.
И двајцата наши фудбалери беа во своитре екипи, но само Елмас беше во стартните 11, додека Пандев влезе во второто полувреме.
Уште во 7. минута Елмас ја затресе мрежата на домашната Џеноа, но по интервенција на ВАР главниот судија Маурицио Маријани му го поништи голот поради играње со рака. Не поради вина на нашиот фудбалер, туку претходно во текот на акцијата Гркот Костас Манолас играше со рака.
Подоцна Елмас имаше одличен обид со полуножички, но Матија Перин возврати со успешна интервенција.
Во судиското надополнување од првиот дел Дрис Мертенс сепак донесе водство за Наполи. Џеноа израмни само 4 минути по паузата преку Едоардо Голданига, а Ирвинг Лосано во 66-тата го врати водството на гостите.
Тогаш, во 71. минута на теренот влезе и Горан Пандев. Пандев и Елмас играа еден против друг 11 минути бидејќи во 82. минута Елмас беше повлечен од игра од страна на тренерот Џенаро Гатузо. Резултатот остана непроменет.
Џеноа со овој пораз падна во опасната зона за испаѓање каде има 27 бодови, еден помалку од Лече кој е во безбедниот дел. Наполи со 51 бод го дели 5. место со Рома, токму она кое води во групите од Лига Европа.