Само две и пол недели откако гледачите ја проголтаа втората сезона на „Emily in Paris“ без да остават ниту трошка кроасан зад себе, стриминг платформата Netflix соопшти дека серијата е обновена за уште две сезони.
Романтичната хумористична серија создадена од Дарен Стар, човекот кој стои зад „Sex and the City“, сега ќе ја следи Емили (Лили Колинс) низ третата и четвртата сезона од серијата, по одличниот успех на првите две сезони.
Иако Netflix не ги објавува податоците за гледаноста, наведе дека новата сезона на серијата е на врвот на глобалната топ 10 листа во 94 земји, со 107,6 милиони прегледани часови во првите пет дена од објавувањето. Првата сезона на серијата беше најгледаната комедија на платформата за 2020 година.
Иако досега серијата, како што кажува самото име, се одвиваше претежно во Париз (со повремени излети до Сен Тропе или живописните лозја на Шампањ), минатата сезона ги остави гледачите во неизвесност. Сега кога е најавено обновувањето, останува прашањето: дали сепак Емили ќе остане во Париз? Иако можеби сè уште не го знаеме одговорот на тоа конкретно прашање, идејата за „Емили во Чикаго“ го нема истиот примамлив призвук.
Во интервју за Vogue Australia претходно оваа година, Лили Колинс зборуваше за по малку дрскиот карактер на нејзиниот лик и за тоа колку таа се смета за среќна што ја добила улогата.
„Емили се мотивира од работата, таа е страсна, решителна, бистра, смела, весела, малку очигледна и секогаш своја без пардон“, резимира Колинс.
Каде и да пристигне Емили, може да се претпостави дека заплетканите романси со многу драма и смелите модни моменти - кои оваа сезона беа поизразени од кога било - ќе продолжат.
