Актерите Ерик Робертс и Тифани Хадиш се најзафатени актери во Холивуд, покажа истражувањето на Resume.io кое опфати скоро 150 холивудски актери и нивната работа во последните 10 години.
Братот на Џулија Робертс има кариера долга четири децении. Титулата за највреден актер ја доби благодарение на над 400 филмски ангажмани во изминатите 10 години. Од 2010 година, Ерик Робертс се има појавени во ТВ-сериите The Young and the Restless (2010-2011), Lost Girl (2015), Class Act (2019), Medinah (2016-2020), како и во бројни филмови меѓу кои и The Expendables (2010), Christmas in Compton (2012), There Is Many Like Us (2015) и Night Walk (2019).
Тифани Хадиш има вкупно 121 филмски ангажман. Присутна во Холивуд е како писателка, музичарка и продуцентка. Во 2018 година доби Еми награда за нејзиното гостување во Saturday Night Live. 40-годишната актерка има над 120 филмски ангажмани во последните 10 години. Се појави во Real Husbands of Hollywood (2013-2014), Legends of Chamberlain Heights (2016-2017), The Last O.G. (2018-2020), како и во неколку филмови.
Трет на листата е Џејмс Франко со 245 проекти, со импресивна работа како режисер, продуцент на филмови и серии во изминатите 10 години. Воедно, тој е и најкреативен во Холивуд. Според истражувањето, неговото име се нашло на 100 проекти во последните 10 години.
Кејт Бланшет важи за најнаградувана актерка. За десет години има добиено 155 награди, а номинирана е 189 пати. Нејзиниот колега Леонардо Дикаприо од 245 номинации има освоено 99 награди, меѓу кои и првиот Оскар во 2016 година.
Вил Смит не е само актер, туку и музичар кој создава музика за филмовите во кои се појавува. Тоа го направил вкупно 39 пати во изминатите 10 години.
На листата со највредни актери се најдоа имињата на Елизабет Бенкс, Кевин Харт, Шарлиз Терон, Двејн Џонсон, Бри Ларсон, Идрис Елба, Џесика Честејн, Скарлет Јохансон, Том Хенкс, Самјуел Л. Џексон и други.