Компаниите од ЕУ би можеле да добијат 25 отсто повеќе државна помош поради последиците предизвикани од западните санкции врз Русија, доведувајќи го во прашање снабдувањето со енергија, покажуваат документите на Европската комисија.
Во март, Европската комисија ги олесни регулативите за државна помош за компаниите со цел да им овозможи на членките на ЕУ да стават на располагање до 400.000 евра помош и да надоместат до 30 отсто од трошоците за енергија.
Во понеделникот, Брисел соопшти дека на земјите од ЕУ им испратил предлог за прилагодување на тие регулативи, кои беа усвоени за поддршка на економијата „во контекст на руската инвазија на Украина“, се вели во соопштението.
Се зголемува максималната дозволена количина на поддршка
„Со оглед на долготрајната руска инвазија на Украина и нејзините директни и индиректни последици во економијата и енергетската ситуација, Комисијата ја проценува потребата од прилагодување на Привремената кризна рамка за државна помош“, се додава.
Комисијата би можела да го зголеми дозволениот максимален износ на поддршка на 500.000 евра, а владите би ги поддржале компаниите со директни грантови, намалени даноци и мерки како гаранции, заеми и докапитализација, пишува Reuters повикувајќи се на документот на ЕК.
Границата за државна поддршка за компаниите од земјоделскиот сектор би се зголемила на 62.000 евра, а за рибарството и аквакултурата на 75.000 евра, од сегашните 35.000 евра. Брисел рече дека ќе побара повратна информација од земјите на ЕУ за предлогот, но не даде бројки, забележа Reuters.
Планот е да се олеснат инвестициите во обновливите извори на енергија
Комисијата, исто така, планира да им олесни на владите да инвестираат во обновлива енергија, вклучително и „зелен“ водород, биогас и биометан и обновливи извори на топлинска енергија, како дел од планираното намалување на потрошувачката на руска нафта и природен гас и проширување на изворите на енергија.
Планот, исто така, вклучува стимулации за земјите од ЕУ да создадат нови програми за подобрување на енергетската ефикасност и декарбонизација на индустријата преку јавни тендери или директна поддршка.
„Предлагаме приспособување на Привремената рамка за кризи за да ги одрази и поддржи важните и итни цели на планот REPowerEU за забрзана диверзификација на снабдувањето со енергија за да стане уште побрза независно од фосилните горива“, рече потпретседателката на ЕК Маргрете Вестагер.
