Благодарение на успехот на масовната вакцинација и драстичното подобрување на епидемиолошката состојба, премиерката Ана Брнабиќ и Кризниот штаб на Република Србија официјално го означија 21 јуни како ден кога Србија ќе се врати во нормален живот и ќе овозможи фестивали и концерти.
Како придонес кон општата безбедност, како и на самиот фестивал, српското Министерство за здравство ќе обезбеди вакцини за 1.500 странски изведувачи и посетители на „EXIT“. Исто така, „EXIT“ одвои 3.000 влезници за отворањето на фестивалот на 8 јули кои ќе им бидат поделени на медицинските работници.
Големата прослава на 20-годишнината од фестивалот „EXIT“ ќе се одржи од 8 до 11 јули 2021 година на Петроварадинската тврдина, а своите настапи веќе ги потврдија некои од најголемите светски и регионални имиња како што се Давид Гета, диџеј Снејк, „Sabaton“, Нина Кравиц, Паул Калкбренер, Тајга, Соломун, Денис Султа и диџеј Топиќ, Робин Шулц, Асаф Авидан, Сатори, Борис Брејча, Хани Дижон, „Hot Since 82“, „Meduza“, Пол ван Дајк, „Artbat“ и Шек Вес. Целосниот распоред по денови наскоро ќе биде објавен на официјалната веб-страница на фестивалот.
Србија е веќе отворена за туристи, а сите детали во врска со влезот на фестивалот ќе бидат објавени навреме на официјалната веб-страница на „EXIT“, во согласност со идните епидемиолошки мерки на Владата на Република Србија.
„EXIT“ и другите српски фестивали започнаа национална кампања за вакцинација минатиот петок, фокусирајќи се на младите - да придонесат за враќање во нормалниот живот и да се вакцинираат. Тоа е единствениот начин да се постигне зацртаната заедничка цел - да се вакцинираат повеќе од 50 проценти од возрасната популација на Србија пред 21 јуни, дополнително да се намали дневниот број на случаи и да се помогне во борбата за менталното здравје на младите.
Во моментов, потребно е да се вакцинираат околу 5% од возрасните додека не се постигне таа цел, а Србија исто така бележи пад од 95% од дневно заразените во последните неколку недели. Самата кампања работи во две насоки: повеќе нема да играм / танцувам / свирам сам/а, наменета за сите оние на кои им недостасуваат концертите и фестивалите, и Дали има некој подобра идеја, наменета за сите оние кои не се сигурни дека вакцинацијата е најдобриот начин за излез од пандемиската криза.
