Предводникот на Борусија вечерва е пред тешка задача бидејќи го пречекува тимот на ПСЖ, еден од фаворитите за освојување на пехарот.
Лусјан Фавр е швајцарски тренер, но од францускиот дел на земјата. Во Франција беше само еднаш, кога ја тренираше Ница две сезони пред во 2018 да дојде во Дортмунд. Претходно ги водеше и Борусија од Менхенгладбах, Херта, Цирих, Сервет, Ивердон и Ешален.
„За да се подготвиме за овој натпревар гледавме неколку натпревари на ПСЖ. Ги анализиравме нивните играчи и подготвени сме за да се соочиме со нив. Но, тие се опасен тим, завршија со добра предност пред Реал Мадрид во групната фаза. Тоа кажува сѐ. Сепак, на крајот сѐ ќе зависи од тоа како ние ќе одиграме“, вели тој.
Фавр не смета најголемата опасност по неговиот гол ќе биде Нејмар бидејќи ПСЖ има и други одлични играчи. Всушност, неговиот колега Тухел е на слатки маки кога бира кои играчи ќе ја сочинуваат офанзивата.
„Нејмар е многу, многу добар, но таму се и Мбапе и Ди Марија. Можам да набројам уште десет добри играчи. Сите играчи на ПСЖ имаат одлични квалитети, а Реал Мадрид го победија и без Нејмар“, смета Фавр.
„Одлични се во крадењето на топката и брзо се префрлаат во напад. Против нив треба да се игра контра пресинг, но може и да се чека стрпливо на контри“, открива дел од против играта која ја подготвува за вечерва.
Адутот на Берусија е норвешкото чудо Ерлинг Браут Холанд кој денеска ќе дебитира во Лигата на шампионите во жолтиот дрес.
„Многу брзо се адаптираше и ја покажа неговата сила, иако има само 19 години. Се разбира, во Дортмунд е поинаку отколку во Салцбург, но тој и за нив играше во Лигата на шампионите и постигнуваше голови. Се надевам дека тоа ќе го прави и со нас“, заврши Фавр.