Националниот парк Јосемити во Калифорнија е познат по впечатливите пејзажи, монументалните карпи и бујните водопади.
Но оваа недела, посетителите на паркот се таму за една ретка и спектакуларна глетка – еден мал водопад кој кога ќе се појави на зајдисонце изгледа како да е од оган.
Секоја година во февруари, илјадници луѓе доаѓаат да го видат овој феномен, водопадот Хорстејл Фол, како „пламти“ на источната страна на Ел Капитан.
Незаборавна глетка
Фотографот Арон Мејер живо се сеќава на првиот пат кога го видел огнениот водопад, таа спектакуларна глетка кога февруарското зајдисонце го обојува малиот водопад.
„Облаците се растераа баш пред зајдисонце и изгледаше како некој да го потпалил водопадот со ќибритче и тој пламна од горе до долу“, раскажува тој за неговата прва посета во 2011 година.
„Сите почнавме да се радуваме, да викаме и да ракоплескаме... тоа беше најчудесното нешто што сум го видел во животот.“
Тогаш, фотографирањето на природен феномен било чиста среќа. Појавата на „огнопадот“, како што го нарекуваат, бара да бидат задоволени неколку услови: доволно влажност за да потече водопадот, јасно небо за да продре светлината и вистинскиот агол за да може зајдисонцето да се огледа во водопадот висок 480 метри.
По оваа посета, Мејерс, кој е дипломиран инженер, направил компјутерска програма што може да пресмета кои денови ќе бидат најдобри аголот и временските услови за набљудување на феноменот. Потоа ги објавил неговите препораки на неговиот блог.
Неколку години се чинело дека никој не го забележал неговиот труд, сѐ до 2015 година, кога видел дека некој испечатил примерок од неговиот план за набљудување од блогот.
Благодарение на дигиталната опрема за фотографирање и на социјалните мрежи, огнопадот во паркот Јосемити стана вирална атракција и секоја година има сѐ повеќе и повеќе љубопитни набљудувачи, од кои повеќето се аматерски и професионални фотографи.
Популарноста може да му наштети на паркот
Пол Рајфер, фотограф од Велика Британија, вели дека популарноста на огнениот водопад сега за него е причина да не оди таму. Тој дури и рече дека последниот пат кога бил, му се чинело дека е на концерт на отворено, а не на набљудување природен феномен.
Тој исто така предупредува дека толпите луѓе и поставувањето опрема за фотографирање прави штета на природата, најмногу преку еродирање на почвата.
„Огнопадот можеби ќе стане жртва на сопствениот успех“, вели тој.
Токму затоа, управата на паркот ќе го ограничи просторот за набљудување на феноменот, како и начинот на кој ќе може да се стигне дотаму. Фотографите ќе треба да пешачат околу 2 километри до местото каде ќе смеат да ја постават опремата, што според некои фотографи е премногу строго.
Иронично е, но климатските промени можно е да придонесат за второ појавување на огнениот водопад – кон крајот на октомври. Тогаш обично нема вода, но ако влажноста се зголеми во овој период, другите услови се задоволени за појава и набљудување на огнопадот.