Играчот на Манчестер Јунајтед само една година е во Англија, а веќе успеа да собере најмногу награди за Играч на месецот.
Португалскиот треквартиста Бруну Фернандеш ја доби наградата Играч на месецот за декември, со што го сруши рекордот во Премиер лигата кога станува збор за награди од ваков тип во рамките на една календарска година.
Тој е прв играч кој дури четири месеци бил прогласуван за најдобар во една календарска година. Освен декември, во 2020 беше најдобар и во месеците февруари, мај и ноември.
Уште откако дојде на „Олд Трафорд“ пред точно една година од редовите на лисабонски Спортинг, Фернандеш стана клучна алка во тимот на Оле Гунар Солскјер. Неговото доаѓање внесе креативност и класа во играта на Јунајтед, и нормално, тој е лидер на тимот кој сезонава е големо изненадување со лидерската позиција.
Во неговата 12-месечна кариера во Премиер лигата одигра 31 натпревар и постигна 19 голови збогатени со 14 асистенции. Воедно, се покажа и како непогрешлив пеналџија реализирајќи 9 од 10 пенали.
